domingo, 30 de junio de 2013

Un pequeno respiro

Durante as vindeiras dúas semanas a familia marcha de viaxe. Iso non significa que non sigamos traballando moitas cousas, pero sí implica que non poderei entrar a actualizar o blog.

Vémonos á volta con máis ideas e moitas gañas!!!

Era unha vez o corpo...

E chegou o calor, o sol, o verán... Por fin!!! Non foi sen tempo, pero non troux consigo de momento a fuxida dos mocos e os virus. Iso sería moito pedir.

Pouquiño a pouco facemos os nosos pequenos avances en motricidade, aprendendo a saltar, "tema" que me toca desenvolver no grupo de motricidade, a ver se este verán lle podo dar un empurronciño.

De momento déixovos co esquema corporal, material elaborado por Mabel Freixes do grupo de motricidade. Neste caso moita teoría moi importante para podermos avanzar na práctica :)

Tedes todo o material aquí.

lunes, 17 de junio de 2013

Comprendendo un mundo de formas e cores

Pois aínda que me pareza mentira a min mesma, aínda non conseguimos sacarnos as toses de enriba, con moito esforzo e poucas ganas algúns días e outros momentos mellores nos que avanzamos pouco a pouco.

Seguimos traballando coas cores, pero tamén moito traballo de comprensión e de emparellamento de igual con igual (non só a mesma cor coa mesma cor). Este tipo de traballo é fundamental para avanzar tamén no uso do método PECS do que xa vos teño falado. Con Sabela utilizámolo con bastante éxito pero usando fotografías. Os reforzos visuais permítennos explicarlle as cousas que imos facer ou as que lle pedimos que faga pero, de momento, só consegue identificar fotos, non imaxes abstractas (pictogramas) que nos permitirían dar un paso máis na comprensión. Para todos e todas os que non esteades versados na materia póñovos abaixo un par de exemplos de pictos un para "bico" e outro para "desexar". Obviamente é máis difícil de comprender o segundo, por ser un concepto totalmente abstracto, pero tamén permite expresar e explicar moitas máis cousas.

Por todo isto traballamos a identificación de imaxes (igual con igual) e a comprensión oral. Facémolo nestes días de varios xeitos.

Para a identificación de imaxes estou usando uns materiais que comprei en Didó (fantástica tenda para os que vivades na Coruña). O primeiro deles paréceme moi recomendábel porque se trata de colocar con velcro (ese marabilloso invento) imaxes iguais sobre unha plantilla. O material é moi bo para traballar con peques porque se pode lavar, usar como plantilla para outros traballos, aproveitar para inventar historias... e de paso traballas as cores neste caso. Estiven botándolle un ollo á web da marca que fabrica estes xoguetes, Scotchi,  e teñen cousas ben interesants.

O segundo é un puzzle no que colocas imaxe igual sobre igual. Finalmente, tamén estou aproveitando algunha cousiña do estupendo blog de Esther (La sonrisa de Arturo) un par de plantillas para xuntar animais iguais con iguais.

No mundo das cores seguimos traballando con distintos materiais, pero o que mellor parece funcionar no noso caso (cada peque é un mundo) é calquera traballo que teña que ver con meter algo dunha cor dentro de algo da mesma cor: uns tapóns amarelos dentro dunha cunca amarela, culleres vermellas dentro de vaso vermello, etc

Equilibrio en grupo

Aínda que eu sigo traballando baixo mínimos, o grupo de motri segue a tope!!! Non paran de facer cousiñas interesantísimas para @s nos@s peques. Neste caso preséntovos un traballo de Iosune Portugal cun montón de exercicios de equilibrio en grupo e por parellas que creo que vos poden resultar moi atractivos.






Aquí comparto a ligazón para que poidades ver todos os detalles e descargar as actividades. A divertirse!!!!

martes, 11 de junio de 2013

Máis xogos de motricidade fina

Nestes días nos que a primaveira non nos quere regalar sol seguimos cos nosos pequenos avances. Conseguimos soplar por segunda vez nestes tres anos de vida de Sabela poñendo a "cara de peixe" enchendo moito de aire as "bochechas" "bolechas" e todoooo o aire fóra. Foi moi divertido!

Conseguimos tamén pequenos avances en concentración coa paciencia que xa non temos (precisamos vacacións) e, por suposto en comprensión. Seguimos avanzando co método PECS, aínda que o que máis interiorizado ten Sabela é o seu uso para pedirnos cousas, supoño que para ela debe de ser toda unha satisfacción poder facelo.

Seguimos tamén traballando a motricidade fina e a discriminación de cores con distintos materiais (tapóns, vasos, tarxetas de cores, palliñas, etc).



Se queredes avanzar e traballar na motricidade fina aquí vos presento tamén un traballo do grupo de motricidade. Juanma Cano elaborou estas fichas con distintas propostas para traballar a motricidade fina. Seguro que hai algunha que aínda non probastes :)


miércoles, 5 de junio de 2013

E volvemos a relaxarnos

E despois de tanto exercicio imos coa segunda parte da fichas para relaxarnos realizadas por Juana Bayo, do grupo de motricidade.

Non sei o que pensades vós, pero nestes escasos días de sol que desfrutamos os ánimos altéranse tanto na casa que aprender a relaxarse paréceme fundamental.


A un lado e ao outro...

E como parece que as toses non nos abandonan nin co sol que loce estes días, imos intentar escorrentalas cun pouco máis de exercicio. De novo un traballo do grupo de motricidade, neste caso centrado na lateralidade e realizado por Kristina Gago.

Trátase de conseguir que o dominio do corpo e dos órganos sensoriais sexa simétrico. Con isto, ademais de termos unha boa coordinación, axudamos tamén a conectar entre sí os dous hemisferios cerebrais.



Veña, a mover o esquelete todo o mundo!!


martes, 4 de junio de 2013

Inspira, espira

E, como non podía ser de outro xeito, despois de traballar, hai que relaxarse. Para iso vos deixo aquí outro traballo do grupo de motricidade, neste caso de Juana Bayo. Todos e todas moi tranquiliños, con música suave ou silencio, e a relaxar a cara o pescozo e xa de paso todo o corpo se podemos.

Moitas veces esquecemos a importancia da relaxación dentro da nosa actividade diaria e no caso dos nosos e as nosas peques é especialmente importante. Sabela ponse moi nerviosa e non sabe por onde "botar para fóra". Temos que aprender a dicir: "agarda un segundo, imos relaxarnos"...



Inspirade, espirade



Actividades propioceptivas

Aquí estou. Levo 15 días enferma e na miña casa parece que os virus están facendo estragos, así que sentíndoo moito teño o blog abandonadiño e a Sabela traballando nas cousas nas que xa estabamos avanzando (ademais do seu inicio en estimulación logopédica específica).

Como no grupo de motricidade non paran, aquí vos deixo as actividades propioceptivas ideadas por Norkys Enmanuel García. Para aqueles aos que lles sone moi estrano este término, propiocepción é a capacidade que ten o corpo de detectar o movemento e a posición das articulacións.



A propiocepción habilítanos para verificar cal é a orientación espacial do noso corpo ou dunha parte do noso corpo no espacio, a sincronización dos movementos e a súa velocidade, a forza exercida polos nosos músculos e canto e a que velocidade se contrae o músculo. En resumo, é o que nos permite ter conciencia do noso corpo e do que facemos con el.

Podedes ver estes superexercicios aquí.